Egun goibelik ez da

nire itsasertzean,

beldur gabe

urrutira so egitean.

Bihozkada baten lorratza

jarraitu dut itsuka;

orain denak zentzua dauka.

Zerua esperantza-argiz jantziko da,

ametsek koloreztatuko dute lurra. 

Haizeak ez nau inoiz

bidetik atera,

pauso irmoz

osatu dut ibilera.

Ausardiaren irribarrez

gaindituz eroriak,

orbaindu zaizkit zauriak.

Zerua esperantza-argiz jantziko da,

ametsek koloreztatuko dute lurra. 

Gaur arin sumatzen naiz

oroitzapenen zama

atzean utzita.

Ulertu dut azkenik,

ibiltaririk gabe

ez dela biderik.